Husn majboor E intezaar nahi

Ishq minnat kash E qaraar nahi
Husn majboor E intezaar nahi

Teri ranjish ki intehaa maloom
HasratoN ka miri shumaar nahi

Apni nazreN bikher de saaqee
Mai ba-andaazaa E khumaar nahi

Zer E lab hai abhi tabassum E dost
Muntashir jalwa E bahaar nahi

Apni takmeel kar raha hun maiN
Warna tujh se to mujh ko pyar nahi

Charaa E intezaar kaun kare
Teri nafrat bhi ustawaar nahi

‘Faiz’ zinda raheN wo haiN to sahi
Kya huaa gar wafa shu’aar nahi

Teri ummid, tera intezar jab se hai

Teri  ummid,       tera   intezar   jab   se   hai

Na shab ko din se shikayat na din ko shab se hai

Kisi ka dard ho karte haiN tere naam raqam

Gilaa hai jo bhi kisi se, tere sabab se hai

Hua hai jab se dil E na – saboor be – qaboo

Kalam tujh se nazar ko baRe adab se hai

Agar sharar hai to bhaRke, jo phool hai to khile

Tarah tarah ki talab, tere rang e lab se hai

KahaaN gaye shab E furqat ke jaagne wale

Sitaara e sehari hum-kalaam kab se hai

(Faiz)

Raushan kaheeN bahaar ke imkaaN hue to haiN

Raushan kaheeN bahaar ke imkaaN hue to haiN
Gulshan mein chaak chand garebaaN hue to haiN

Ab bhi khizaan ka raaj hai lekin kaheen kaheen,
Gosh E rah E chaman mein ghazal-khaaN hue to haiN

Thahri huii hai shab ki siyaahi vaheeN magar
Kuchh kuchh sahar ke rang purafshaaN hue to haiN

In mein lahu jalaa ho hamara K jaan O dil
Mehfil mein kuch chiraagh farozaaN hue to haiN

Haan kaj karo kulaah K sab kuch luta ke hum
Ab be-niyaaz E gardish E dauraaN hue to haiN

Ahl E qafas ki subah E chaman mein khulegi aankh
Baad E sabaa se vada O paimaaN hue to haiN

Hai dasht ab bhi dasht magar, khoon E pa se ‘Faiz’
Sairaab chand khaar E mugelaaN hue to haiN

(Faiz)

Ishq mujhko nahin wahshat hi sahi

Ishq mujhko nahin wahshat hi sahi
Meri wahshat teri shohrat hi sahi

Qat’aa kieje na taa’alluq hum se
Kuchh nahin hai to adaawat hi sahi

Mere hone main hai kya ruswaai
Ye woh majlis nahin khalwat hi sahi

Hum bhi dushman to nahin hain apne
Ghair ko tujh se mohabbat hi sahi

Apni hasti hi se ho jo kuchh ho
Aagahi gar nahin ghaflat hi sahi

Umr harchand k hai barq-E-kharaam
Dil ko khuN karne ki fursat hi sahi

Hum koi tark-e-wafaa karte hain
Naa sahi ishq, museebat hi sahi

Kuchh to de Ae falak-e-na-insaaf
Aah-o-fariyaad ki rukhsat hi sahi

Hum bhi tasleem ki khuu dalenge
Be – neyaazi teri aadat hi sahi!!!

Yaar se chheR chali jaaye “Asad”
Gar nahin wasl to hasrat hi sahi

Koyi ummeed bar naheeN aatii

Koyi ummeed bar naheeN aatii
Koyi soorat nazar naheeN aatee

Maut ka ek din mu’ayyan hai
NeeNd kyuN raat bhar naheeN aaatii?

Aage aatii thii haal-e-dil pe haNsi
Ab kisii baat par naheeN aatii

Jaanta hooN sawaab-e-taa’at-o-zohd
Par tabee’at idhar naheeN aatii

Hai kuchch aeisee hi baat jo chup huN
Warna kya baat kar naheeN aatii

KyoN na cheeKHooN K yaad karate haiN
Meree aawaaz gar naheeN aatii

DaaGH-e-dil gar nazar naheeN aata
Boo bhee ae chaaraagar ! naheeN aatii

Ham wahaaN haiN jahaaN se hamko bhee
Kuchch hamaaree KHabar naheeN aatii

Marte haiN aarzoo meiN marne ki
Maut aatii hai par naheeN aatii

Kaa’baa’ kis muNh se jaaoge ‘GHalib’
Sharm tumko magar naheeN aatii